Këngëtari i njohur Justin Timberlake ka bërë publike se vuan nga një sëmundje e rëndë. Vetëm pak kohë më parë ai përfundoi turneun e tij muzikor. Mbetet e paqartë nëse dhe si do të vazhdojë të performojë në të ardhmen.
Timberlake, i njohur si ish-anëtar i grupit të famshëm NSYNC dhe si artist solo me shumë sukses, deklaroi në Instagram të enjten se është diagnostikuar me borreliozë (një sëmundje që transmetohet nga rriqrat).
“Është një sëmundje që të lodh jashtëzakonisht shumë – si mendërisht, ashtu edhe fizikisht,” – shkroi Timberlake në postimin e tij.
Këngëtari kishte përfunduar të mërkurën në Turqi turneun e tij me titullin Forget Tomorrow. Ai rrëfeu se kishte menduar ta përfundonte më herët turneun për shkak të shëndetit, por dashuria për skenën dhe publikun e shtyu të vazhdonte.
“Jam shumë i lumtur që nuk u ndala,” – shkroi ai.
Çfarë është borrelioza?
Kjo sëmundje shkaktohet nga pickimi i rriqrave dhe mund të shkaktojë simptoma të ngjashme me gripin, inflamacion të kyçeve, e nëse nuk trajtohet me antibiotikë në kohë, mund të çojë në pasoja të rënda afatgjata.
“Sinqerisht nuk e di si do të duket e ardhmja ime në skenë, por këtë periudhë do ta mbaj gjithmonë në zemër. Edhe të gjitha ato më parë. Për mua, këto janë momentet që krijojnë legjendat,” – tha Timberlake.
Gjatë turneut, Timberlake pati disa probleme shëndetësore si bronkit dhe pezmatim të fytit, që e detyruan të anulonte ose të shtynte disa koncerte. Gjashtë shfaqje në SHBA të planifikuara për tetor dhe nëntor u shtynë për në shkurt, ndërsa koncerti i fundit në Ohio u anulua për shkak të një gripi në shkurt.
Përfaqësuesit e Timberlake nuk kanë komentuar ende publikisht për gjendjen e tij.
Në përfundim të postimit të tij në Instagram, këngëtari falënderoi gruan e tij Jessica Biel dhe dy djemtë e tyre, Silas dhe Phin, duke shkruar:
“Asgjë nuk është më e fortë se dashuria juaj pa kushte. Ju jeni zemra dhe shtëpia ime. Jam rrugës.”
