Një teknikë e thjeshtë frymëmarrjeje, e njohur si “frymëmarrja në kuti”, po vlerësohet nga kardiologët si një mjet efektiv për të mbrojtur shëndetin e zemrës – dhe e gjitha zgjat vetëm tre minuta.
Ekspertët thonë se stresi i përditshëm nuk ndikon vetëm në mirëqenien emocionale, por është gjithashtu një faktor real rreziku për probleme kardiovaskulare. Sipas kardiologut Dr. Mohamed Shirazi, kur trupi është nën stres, ndodhin ndryshime të menjëhershme si rritje e tensionit të gjakut, përshpejtim i rrahjeve të zemrës dhe shtim i nivelit të sheqerit dhe kolesterolit – elementë që ndikojnë negativisht në zemër.
Zgjidhja? Një ushtrim i kontrolluar frymëmarrjeje që imiton formën e një kutie.
Si funksionon teknika e “frymëmarrjes në kuti”?
-
Thithni frymë për 4 sekonda
-
Mbani frymën për 4 sekonda
-
Nxirrni frymën për 4 sekonda
-
Qëndroni pa marrë frymë për 4 sekonda
-
Përsëriteni këtë cikël për rreth 3 minuta
Sipas kardiologes Dr. Luiza Spadaro, kjo teknikë ndihmon trupin të kalojë nga një gjendje stresi në një gjendje relaksi të kontrolluar.
“Frymëmarrja në kuti ndihmon në rikthimin e ritmit të qetë të frymëmarrjes pas momenteve të tensionuara dhe ka efekte pozitive edhe në përmirësimin e gjumit,” – thekson ajo.
Dr. Shirazi shton se praktika e rregullt e këtij ushtrimi mund të ulë ndjeshëm nivelin e stresit dhe të përmirësojë funksionin e zemrës dhe të mushkërive.
Ky ushtrim i thjeshtë mund të praktikohet kudo – në shtëpi, në zyrë apo edhe në makina gjatë momenteve të tensionit. Ekspertët sugjerojnë që vetëm pak minuta në ditë mund të bëjnë diferencën për një zemër më të qetë dhe jetë më të shëndetshme.
