Çmimet e naftës këto ditë janë rritur dhe, sipas qytetarëve, kjo po bëhet e papërballueshme. Ata kërkojnë stabilizim të menjëhershëm të çmimeve, duke theksuar se rritjet po e rëndojnë jetesën e përditshme.
Disa qytetarë e lidhin situatën me krizën globale dhe pasojat e luftës në Iran.
Nysret Sopaj thotë se rritja e çmimeve ka prekur të gjitha produktet bazë, por qytetarët po detyrohen t’i përballojnë ato.
“Të gjitha janë rritur: nafta, gjërat ushqimore, krejt çmimet janë të larta, por po duhet t’i përballojmë si mundemi. Po e përballojmë me pension”, tha Sopaj.
Edhe Shemsi Haliti e cilëson situatën si të papërballueshme, duke e vendosur përgjegjësinë te institucionet.
“Vështirë të përballohet, por disi njeriu po duhet të bëjë zgjidhje. Edhe kur nuk ke shtet, të gjitha këto ndodhin si pasojë e mungesës së kontrollit”, tha Haliti.
Ngjashëm mendon edhe Qazim Reçica, i cili thotë se situata ka dalë jashtë çdo norme.
“Me të vërtetë është gjendje shumë e rëndë… kjo është katastrofale për gjendjen ku gjendemi. Thuajse 70 për qind të kohës nuk mund të dalim me makinë”, u shpreh ai.
Ndërsa Mirsad Krasniqi apelon për kujdes më të madh në shpenzime.
“Duhet t’i ulim shpenzimet, të përdorim më pak vetura, të shfrytëzojmë transportin publik…”, tha Krasniqi.
Ministria e Industrisë, Ndërmarrësisë, Tregtisë dhe Inovacionit ka njoftuar se çmimi i naftës të dielën (12 prill) ishte 1.84 euro për litër, benzina 1.44 euro, ndërsa gazi 0.89 euro.
