KEDS ka paralajmëruar mbajtjen e një konference për media lidhur me çështjen e fundit të ngritur në opinion publik për njehsorët elektrikë, temë kjo e inicuar nga Lidhja Demokratike e Kosovës (LDK).
Sipas njoftimit, konferenca do të mbahet të martën, më 1 prill, në zyrat qendrore të KEDS-it, duke filluar nga ora 15:00.
“Ftoheni të merrni pjesë për të përcjellë nga afër qëndrimet dhe sqarimet zyrtare lidhur me këtë çështje. KEDS mbetet e përkushtuar ndaj transparencës, korrektësisë dhe informimit të drejtë të qytetarëve të Kosovës”, thuhet në njoftim.
Nga ana tjetër, përfaqësues të LDK-së kanë ngritur shqetësime për mënyrën e faturimit të energjisë elektrike. Visar Azemi, në disa konferenca për media, ka deklaruar se qytetarët po përballen me keqllogaritje të konsumit të energjisë në njehsorët elektrikë.
Ndërkaq, kryetari i LDK-së, Lumir Abdixhiku, ka kërkuar hetim të menjëhershëm, përgjegjësi institucionale, kompensim për qytetarët dhe ndaljen e çdo rritjeje të tarifave deri në zbardhjen e plotë të situatës.
