Këshilli i Sigurimit i Kombeve të Bashkuara do të mblidhet të martën për takimin e dytë të rregullt të këtij viti mbi situatën në Kosovë.
Në këtë seancë, zëvendës përfaqësuesi special i OKB-së në Kosovë (UNMIK), Milbert Dongjon Shin, do të raportojë mbi zhvillimet politike dhe të sigurisë në Kosovë për periudhën 16 mars – 15 shtator, sipas raportit të fundit të Sekretarit të Përgjithshëm të OKB-së.
Në qendër të diskutimeve do të jenë zbatimi i marrëveshjeve të lehtësuara nga BE-ja, përfshirë Marrëveshjen e Ohrit dhe tensionet e vazhdueshme ndërmjet Kosovës dhe Serbisë.
Sipas raportit, dy takime trepalëshe të mbajtura në Bruksel gjatë verës nuk kanë sjellë përparim të dukshëm në zbatimin e marrëveshjeve ekzistuese, për shkak të mosmarrëveshjeve mbi prioritetet. Po ashtu, Komisioni i Përbashkët për Personat e Zhdukur, i planifikuar që nga dhjetori 2024, nuk është mbledhur ende.
Shin pritet t’u bëjë thirrje Prishtinës dhe Beogradit që të angazhohen me mirëbesim në dialogun e ndërmjetësuar nga BE-ja, duke shmangur veprimet e njëanshme dhe përshkallëzimet në terren.
Raporti thekson gjithashtu brishtësinë e situatës në veri të Kosovës, ku autoritetet kanë mbyllur institucionet e drejtuara nga Serbia si fondet e sigurimeve dhe zyrat e punësimit, veprim që është dënuar nga Beogradi dhe kritikuar nga BE-ja dhe OKB-ja.
