02 Tetor 2025 | QENDRA.INFO
Këshilli i Sigurimit i Kombeve të Bashkuara ka njoftuar se më 21 tetor do të diskutojë raportin më të fundit të Sekretarit të Përgjithshëm, Antonio Guterres, mbi situatën në Kosovë. Ky shqyrtim vjen gjashtë muaj pas një përplasjeje të ashpër verbale mes anëtarëve kryesorë të këshillit mbi të ardhmen e mandatit të misionit të OKB-së në vend.
Raporti i ri do të paraqitet nga shefja e UNMIK-ut, Caroline Ziadeh, dhe pritet të publikohet brenda dhjetë ditëve të ardhshme. Në raportimin e saj më parë, Ziadeh shprehu shqetësim për pasojat e mbylljes së institucioneve nën administrimin e Serbisë, veçanërisht mbi të drejtat ekonomike dhe sociale të qytetarëve të Kosovës, me ndikim të veçantë tek kategoritë më të cenueshme.
Ajo gjithashtu dënoi shkatërrimin e simboleve dhe objekteve fetare, duke theksuar se kjo është e papajtueshme me vlerat themelore të Kombeve të Bashkuara.
Pjesa kyçe e debatit do të jetë e ardhmja e misionit UNMIK, ku Shtetet e Bashkuara dhe Britania kërkojnë përfundimin e mandatit, ndërsa Rusia dhe Kina mbështesin vazhdimin e tij që nga qershori i vitit 1999.
