Një alarm për një mjet shpërthyes në një veturë është ngritur sot në rrugën magjistrale Prishtinë – Fushë Kosovë, pranë një pompe derivatesh.
Rasti është raportuar në Polici nga një qytetar mërgimtar, i cili ka deklaruar se dyshon se dikush i ka vendosur një mjet shpërthyes në veturën e tij.
Pas marrjes së informacionit, Policia e Kosovës ka reaguar menjëherë, duke mbërritur në vendin e ngjarjes dhe duke nisur kontrollet e nevojshme për të menaxhuar situatën.
Zëdhënësja e Policisë për rajonin e Prishtinës, Flora Ahmeti, konfirmoi për mediat se informacioni është pranuar rreth orës 16:00, duke shtuar:
“Rreth orës 16:00 kemi pranuar informatën për një mjet të dyshuar në rrugën Prishtinë – Fushë Kosovë, saktësisht në një automjet të parkuar në afërsi të një pompe të derivateve. Policia menjëherë ka dalë në vendin e ngjarjes dhe ka nisur ndërmarrjen e veprimeve operative të nevojshme për të menaxhuar me situatën.”
Nuk janë dhënë ende detaje të mëtejshme nëse dyshimet janë konfirmuar apo nëse situata është neutralizuar. Zona përreth është izoluar për siguri publike dhe hetimet janë në zhvillim.
Alarm për mjet të dyshuar pranë një pompe derivatesh në rrugën Prishtinë – Fushë Kosovë
