Prishtinë, 2 Tetor 2025 — Kolektivi për Mendim dhe Veprim Feminist ka reaguar publikisht pas ndalimit të mbi 500 aktivisteve dhe aktivistëve ndërkombëtarë nga Forcat e Mbrojtjes së Izraelit (IDF), të cilët po përpiqeshin të dërgonin ndihma humanitare në Rripin e Gazës.
Sipas njoftimit të Kolektivit, mes të ndaluarve ndodhet edhe aktivistja shqiptare Albulena Fazliu, një refugjate e luftës nga Kosova që aktualisht jeton në Gjermani. Kolektivi ka shprehur shqetësim të thellë për sigurinë e saj dhe ka bërë thirrje për reagim të menjëhershëm institucional.
“Shteti i Kosovës duhet të kërkojë menjëherë që Izraeli ta lirojë Albulenën dhe aktivistet e aktivistët tjerë, dhe njëherë e mirë të marrë pozicion politik të qartë duke thirrur për ndalim të shfarosjes së popullit palestinez nga Izraeli,” thuhet në reagim.
Kolektivi gjithashtu thekson se është detyrë e institucioneve dhe e shoqërisë që të qëndrojnë krah për krah me Albulenën, dhe me të gjithë ata që rrezikojnë jetën për të ndihmuar civilët palestinezë.
Ndryshe, flota me 40 anije ndërkombëtare, pjesë e një iniciative humanitare për Gazën, është ndaluar nga forcat izraelite gjatë përpjekjes për të çarë bllokadën dhe për të dorëzuar ndihma humanitare. Fati i shumë aktivistëve që ndodheshin në bordin e anijeve mbetet ende i paqartë.
