Konflikti mes Gjesti-t dhe Onimës, kontrata që po e mban të lidhur me kompaninë e Erkand Shabanit

Fituesi i Big Brother Albania, Besart Kelmendi – i njohur si Gjesti, është përfshirë në një konflikt të hapur me kompaninë Onima, të drejtuar nga Erkand Shabani. Shkak është bërë një kontratë menaxhimi, e cila sipas kompanisë është zgjatur automatikisht edhe pse artisti pretendon se nuk ka pasur mundësi ligjore ta prishë atë.
Burime për Qendra.info bëjnë të ditur se Gjesti kishte nënshkruar kontratë me Onimën përpara hyrjes së tij në “Big Brother Kosova” dhe më pas “Big Brother Albania”. Kontrata kishte afat të caktuar, i cili përfundoi ndërkohë që ai ndodhej brenda shtëpisë së spektaklit. Sipas klauzolës, nëse brenda një muaji pas skadimit nuk kërkohej zgjidhja, ajo zgjatej automatikisht për dy vite.
Ky afat i ka kaluar Gjestit për shkak se ndodhej i izoluar brenda “Big Brother Albania”, duke mos pasur mundësi të ndërhynte. Pas daljes si fitues, ai është përpjekur të shkëputet nga Onima, por kompania, e mbështetur nga pronari Erkand Shabani, ka insistuar në vlefshmërinë e kontratës.
Konflikti tashmë ka dalë në publik, duke u pasqyruar në media, ndërsa Shabani ka deklaruar se është ndier i kërcënuar nga persona të afërt me artistin. Situata pritet të marrë drejtim në institucionet ligjore nëse palët nuk arrijnë kompromis.