Kanceri kolorektal është kanceri i tretë më i zakonshëm në botë.
Diagnozat e kancerit të zorrës së trashë tek personat nën moshën 50 vjeç janë në rritje për një sërë arsyesh, përfshirë konsumimin e ushqimeve të përpunuara, shkruan burimi Medical News Today transmeton Gazeta Shneta.
Që nga viti 2022, ka pasur mbi 1.9 milionë raste të reja me kancer kolorektal në mbarë botën, duke e bërë atë kancerin e tretë më të përhapur globalisht.
Shkencëtarët besojnë se rreziku në rritje i kancerit kolorektal në moshë të re lidhet me një kombinim faktorësh, përfshirë mënyrën e jetesës sedentare, obezitetin, konsumimin e alkoolit, faktorët mjedisorë dhe një dietë të pasur me ushqime të përpunuara.
Tani, një studim i ri i botuar në revistën “BMC Gastroenterology”, shton perimet krucifere — si brokoli, lulelakra — në këtë listë, me prova që sugjerojnë se konsumimi i tyre mund të ndihmojë në uljen e rrezikut.
Për këtë studim, studiuesit analizuan të dhëna nga gjithsej 17 studime, që përfshinin mbi 97,000 pjesëmarrës, për të gjetur lidhje të mundshme midis sasisë së perimeve krucifere të konsumuara dhe shfaqjes së kancerit të zorrës së trashë.
Në përfundim, ata gjetën se pjesëmarrësit që konsumonin më shumë këto perime — midis 20 dhe 40 gramë në ditë — kishin 20% më pak rrezik për kancer të zorrës së trashë, krahasuar me ata që konsumonin më pak.
Studime të kaluara e kanë lidhur konsumimin e perimeve krucifere me uljen e rrezikut për kancer të zorrës së trashë, vezoreve, prostatës, fshikëzës së urinës, mushkërive, stomakut dhe pankreasit.
