Pas dështimit të 54-të me radhë për konstituimin e Kuvendit të Kosovës, vendi ka hyrë zyrtarisht në një fazë të paqartësisë juridike dhe institucionale, pas skadimit të afatit 30-ditor të vendosur nga Gjykata Kushtetuese. Deri më 8 gusht, kur Kushtetuesja pritet të dalë me një vendim përfundimtar, asnjë veprim apo vendim i Kuvendit nuk mund të ndërmerret.
Tentimet e dështuara dhe mungesa e konsensusit
Dy seanca të mbajtura më 26 korrik, të cilat ishin përpjekjet e fundit për konstituimin e Kuvendit, dështuan për shkak të mungesës së konsensusit politik, veçanërisht rreth emrit të kryetares së Kuvendit. Lëvizja Vetëvendosje, që doli fituese me 48 mandate, këmbënguli për Albulena Haxhiun, emër që u refuzua nga PDK, LDK, AAK dhe pjesa më e madhe e pakicave, përfshirë Listën Serbe.
Akuzat politike në dy drejtime
Lëvizja Vetëvendosje ka fajësuar opozitën për bllokadë dhe sabotim të procesit.
“S’patëm sukses. Deputetët e opozitës refuzuan të kryejnë obligimin e tyre kushtetues. Po tentojnë të grabisin përmes manovrave politike atë që nuk ua dhanë qytetarët me votë,” deklaroi ministri në detyrë, Hekuran Murati.
Opozita, në anën tjetër, akuzon Vetëvendosjen dhe Albin Kurtin për mosreflektim, arrogancë politike dhe uzurpim të institucioneve.
“Kryeneçësia e Kurtit është më e madhe se përgjegjësia. Kosova është futur në një zonë gri, pa busull, ku qytetarët nuk kanë adresë,” deklaroi Memli Krasniqi, kryetar i PDK-së.
“Je uzurpator i institucioneve. Po qëndron në pushtet vetëm sepse ende nuk kemi një prokurori dhe polici që ta ndalojë një gjë të tillë,” shtoi kryetari i LDK-së, Lumir Abdixhiku.
Reagimi ndërkombëtar: Kartoni i kuq për klasën politike
Diplomatët ndërkombëtarë ishin të pranishëm gjatë seancës së fundit parlamentare, në përpjekje për të nxitur formimin e institucioneve. Por pas dështimit të radhës, ata reaguan me zhgënjim.
Ambasadori gjerman, Jorn Rohde, e cilësoi situatën si një dështim përballë qytetarëve dhe paralajmëroi për dëme të thella në besimin publik.
Ambasadori i BE-së, Aivo Orav, kërkoi formim të menjëhershëm të Kuvendit dhe Qeverisë për të forcuar raportet me Brukselin.
Ambasadori britanik, Jonathan Hargreaves, paralajmëroi se Kosova është futur në territor të panjohur, duke humbur aftësinë për vendimmarrje vendore dhe ndërkombëtare.
Gjykata Kushtetuese: Rrezik për rendin kushtetues
Pas kërkesës së presidentes Vjosa Osmani, Gjykata Kushtetuese vendosi masë të përkohshme për të bllokuar çdo veprim nga deputetët deri në një vendim përfundimtar më 8 gusht.
“Çdo veprim i ndërmarrë pas 26 korrikut mund të shkaktojë dëme të pariparueshme për rendin kushtetues dhe funksionimin e institucioneve kyçe të Republikës së Kosovës”, thuhet në komunikatën e Gjykatës.
Institucionet pezull, qytetarët pa përfaqësim
Me Kuvendin të pakonstituuar dhe Qeverinë në detyrë, Kosova aktualisht ndodhet në një vakum politik dhe juridik, me pasoja serioze për funksionimin e shtetit dhe proceset ndërkombëtare.
Organizatat e shoqërisë civile dhe partnerët ndërkombëtarë kanë bërë thirrje për kompromis dhe përgjegjësi politike, në mënyrë që të shmanget një krizë edhe më e thellë institucionale.
Redaksia do të vazhdojë mbulimin e zhvillimeve politike.
