06 tetor 2025 – Vetëm 26 ditë pas emërimit, kryeministri francez Sebastien Lecornu ka dhënë dorëheqje nga posti i tij, duke e zgjatur krizën politike që ka përfshirë Francën prej më shumë se një viti.
Dorëheqja u konfirmua nga Pallati Elysee, pas një takimi më shumë se njëorësh mes Lecornut dhe presidentit Emmanuel Macron.
Lecornu mori detyrën pas rrëzimit të qeverisë së François Bayrous, por kabineti i tij u kritikua ashpër nga partitë opozitare për mungesë ndryshimi dhe vazhdim të politikave të mëparshme.
Pas dorëheqjes, opozita franceze po kërkon zgjedhje të reja të jashtëzakonshme, ndërsa disa parti i kanë bërë thirrje Macronit që të japë dorëheqje. Megjithatë, presidenti ka theksuar se do të qëndrojë në detyrë deri në përfundim të mandatit më 2027.
Franca ndodhet në një ngërç të thellë politik që nga zgjedhjet e parakohshme parlamentare të vitit 2024, të cilat nuk prodhuan një shumicë të qartë. Lecornu, ish-ministër i Forcave të Armatosura, është kryeministri i pestë i Francës brenda dy viteve.
