Kadri Kryeziu, ish-gjyqtar i Gjykatës Kushtetuese, ka reaguar lidhur me situatën e krijuar pas dështimit për konstituimin e Kuvendit të Kosovës, duke theksuar se vendimet e Gjykatës Kushtetuese nuk janë sugjerime, por ligje detyruese për institucionet shtetërore.
Në një intervistë për RTK, Kryeziu tha se shteti nuk ka të drejtë të komentojë apo interpretojë aktgjykimin, por ka vetëm një detyrë: ta zbatojë atë.
“Në sistemet demokratike, secili ka të drejtë të interpretojë, edhe qytetari i thjeshtë, edhe ligjvënësi. Por shteti, në këtë rast, nuk duhet të flasë. Shteti duhet vetëm të zbatojë vendimin,” tha ai.
Kryeziu e cilësoi çdo vonesë për konstituimin e Kuvendit si cenim të rendit kushtetues dhe juridik, dhe shtoi se kjo mund të përbëjë vepër penale, e dënueshme sipas Kodit Penal të Republikës së Kosovës.
“Brenda 30 ditësh, nëse deputetët nuk e konstituojnë Parlamentin, kemi shkelje të Kushtetutës. Kjo është vepër penale dhe e ndëshkueshme ligjërisht,” tha ai.
Deklarata e Kryeziut vjen në një kohë kur debati mbi interpretimin e aktgjykimeve të Gjykatës Kushtetuese është intensifikuar, duke krijuar pasiguri në lidhje me funksionimin institucional dhe respektimin e rendit kushtetues në vend.
