Prishtinë, 25 tetor 2025 – Deputetja e Lëvizjes Vetëvendosje (VV), Mimoza Kusari-Lila, ka pranuar se aktualisht kryeministri në detyrë dhe mandatar për formimin e qeverisë së re, Albin Kurti, nuk i ka votat e mjaftueshme për ta formuar kabinetin qeveritar.
Në një intervistë në emisionin “Info Nata” në Tëvë1, Kusari-Lila tha se për momentin VV ka në dispozicion 48 deputetë nga grupi parlamentar, ndërsa me përfaqësuesit e komuniteteve joshumicë dhe deputetin nga radhët e nënkryetarit Rashiq, numri arrin në rreth 56-57 deputetë — pra 4 deri në 5 më pak se shumica e nevojshme prej 61 votash për formimin e qeverisë.
“Pritjet janë që të kemi një qeveri nga mandatari e kryeministri aktual Kurti, e cila pritet t’i marrë të paktën 61 vota. Megjithatë, në këtë moment, edhe përderisa po flasim, ende nuk kemi konfirmim zyrtar mbi koalicionet e mundshme, duke marrë parasysh që numri i deputetëve në grupin tonë parlamentar është 48, 8 të tjerë janë nga komuniteti joshumicë dhe një është nga nënkryetari Rashiq. Që prapë i bie që jemi afër 4-5 deputetë mangu për të pasur minimumin e shumicës që duhet pasur,” deklaroi ajo.
Kusari-Lila theksoi se negociatat për krijimin e shumicës parlamentare janë ende në zhvillim, ndërsa pritet që ditët në vijim të sjellin më shumë qartësi rreth koalicioneve të mundshme./Qendra.INFO
