Kuvendi i Serbisë ka miratuar të premten një ligj të posaçëm që hap rrugën për ndërtimin e një hoteli luksoz nga Jared Kushner, dhëndri i presidentit amerikan Donald Trump, në ish-godinën e Shtabit të Përgjithshëm të Ushtrisë Jugosllave në qendër të Beogradit.
Ligji, i quajtur “lex specialis”, shpall projektin si prioritet kombëtar dhe lejon që të gjitha procedurat për zbatimin e tij të trajtohen si urgjente. Projekti, me vlerë 500 milionë dollarë, ka shkaktuar reagime të opozitës dhe aktivistëve, të cilët paralajmërojnë për mbrojtjen e ndërtesës me vlerë arkitekturore, e cila ishte pjesërisht e dëmtuar gjatë bombardimeve të NATO-s në 1999.
Shumica parlamentare argumenton se godinën e dëmtuar nuk mund ta rinovojë dhe se shembja e saj është e domosdoshme për realizimin e projektit. Opozita dhe qytetarë paralajmërojnë protesta për të ndaluar shembjen e simbolit arkitekturor.
