Soçi, 3 tetor 2025 – Në një fjalim në Forumin Valdai, një platformë ndërkombëtare e njohur si zëdhënës i Kremlinit, presidenti rus Vladimir Putini bëri një sulm të gjerë verbal ndaj Perëndimit, duke mohuar përfshirjen e Rusisë në incidentet me dronë që kanë paralizuar infrastrukturën kritike në Evropë dhe duke akuzuar NATO-n dhe Francën për “shpërqendrim” dhe “përshkallëzim tensionesh”.
Pyetjes së moderatorit nëse Rusia ka dërguar dronë në Danimarkë, Putini iu përgjigj me një gjest përçmues: “Nuk do ta bëj më”, duke e krahasuar të gjithë situatën me një “panik nga UFO-t” dhe duke e përshkruar çështjen si “fantazi qesharake”.
Ai akuzoi Francën se po përdor incidentet me dronë për të shpërqendruar vëmendjen nga problemet e brendshme dhe paralajmëroi se “rreziku i një përplasjeje do të rritet ndjeshëm”. Po ashtu, Putini mohoi vendosjen e trupave në kufirin me Finlandën dhe e quajti NATO-n “tigër prej letre”.
Në fjalimin e tij, ai kritikoi edhe ndihmën e mundshme të SHBA-së për Ukrainën me raketat Tomahawk, duke thënë se kjo do të shënojë një “shkallë të re përshkallëzimi” në marrëdhëniet mes Moskës dhe Uashingtonit, megjithatë theksoi se mbrojtja ajrore ruse është e gatshme për çdo kërcënim.
Putini gjithashtu lavdëroi ish-presidentin amerikan Donald Trump për përpjekjet për paqe në Lindjen e Mesme dhe Ukrainë, duke thënë se takimi i tyre në Alaskë ishte një mundësi për gjetjen e zgjidhjes, megjithëse deri tani nuk është arritur rezultat konkret.
Ndërkohë, tema e dronëve u bë reale për Rusinë edhe gjatë samitit në Soçi: u aktivizua alarmi në qytet, me paralajmërime SMS për banorët që të largohen nga rrugët dhe të qëndrojnë larg dritareve. Aeroportet e Soçit dhe Gelendzhikut u mbyllën për shkak të kërcënimit.
Putini e quajti gjithashtu “pirateri” sekuestrimin nga Franca të një anije-cisternë me origjinë të dyshimtë, të cilën autoritetet e Francës e lidhin me flotën ruse dhe incidentet e fundit me dronë në Danimarkë dhe Norvegji.
Ky fjalim dhe incidentet e fundit me dronë pasqyrojnë tensionet e larta në rajon, ndërsa Moska dhe Perëndimi akuzojnë njëra-tjetrën për përshkallëzim dhe provokime.
