Pesë vrasje u regjistruan në Kosovë brenda 24 orësh, ndërsa po ashtu gjashtë viktima u shënuan në aksidente trafiku. Kjo është gjendje tejet shqetësuese sipas profesorit Blerim Latifi, i cili ka kritika edhe për qeverinë në detyrë, shkruan Gazeta Metro.
Latifi tha se në Kosovën e vitit 2025, një çerek shekulli pas luftës së fundit, sërish po shënohen numra të të vrarëve sikur të ishte gjendje lufte.
“Pesë të vrarë brenda 24 orësh. Bilanc lufte në Kosovën e vitit 2025”, tha profesori Latifi në Facebook.
Më tej, ai tha se problem i madh është fakti se Kosova ka mbetur tërësisht pa institucione legjitime e të besueshme.
“Kur autoriteti juridik i shtetit humbet besueshmërinë, atëherë, si një mallkim fatal, rikthehet ligji i moçëm i Talionit: dhëmb për dhëmb, sy për sy, kokë për kokë”, shkroi krejt në fund Latifi.
Vrasjet, aksidentet me fatalitet dhe vetëvrasjet në Kosovë gjithnjë e po shtohen, por si duket shoqëria ende nuk është në alarm për këto dukuri shqetësuese./gazetametro.net
