Në 35-vjetorin e shpalljes së Deklaratës Kushtetuese të 2 Korrikut 1990, Lidhja Demokratike e Kosovës (LDK) ka përkujtuar këtë ngjarje si një pikënisje historike drejt shtetësisë së Kosovës.
Përmes një komunikate për media, LDK e ka cilësuar Deklaratën e 2 Korrikut si një akt të guximshëm dhe themelor për rrugën e Kosovës drejt lirisë, pavarësisë dhe integrimit euroatlantik.
“Në rrethana jashtëzakonisht të vështira, nën rrethim ushtarak dhe presion të ashpër nga regjimi serb, 114 delegatë të Kuvendit të atëhershëm të Kosovës e shpallën Kosovën si njësi të barabartë dhe të pavarur brenda federatës së atëhershme, duke shprehur vullnetin e palëkundur të popullit për liri, pavarësi dhe demokraci”, thuhet në deklaratë.
LDK nënvizon se ky akt sfidoi regjimin shtypës dhe u bë bazë e konsolidimit të vizionit për një Kosovë të lirë dhe demokratike.
Në deklaratë përmendet edhe roli udhëheqës i presidentit historik, Ibrahim Rugova, në unifikimin e popullit rreth kësaj kauze, si dhe ndihma vendimtare e NATO-s që solli fundin e shtypjes në Kosovë.
“Shprehim mirënjohjen më të thellë për delegatët e 2 Korrikut dhe për të gjithë ata që kontribuuan në rrugëtimin e Kosovës drejt lirisë dhe shtetësisë. Përkujtojmë me nderim dëshmorët, të rënët dhe të burgosurit politikë që sakrifikuan gjithçka për vendin”, thekson LDK.
Në fund të komunikatës, LDK e cilëson Deklaratën e 2 Korrikut si një “gurthemel të pathyeshëm” të shtetësisë së Kosovës dhe si dëshmi të qartë të aspiratave të saj për integrim në NATO, BE dhe miqësi të përhershme me SHBA-të.
