Një burim i Periskopit ka thënë se skenari i parë është që gjyqtarët e organit më të lartë juridik në vend, të dalin më opinion që votimi i fshehtë mund të lejohet.
Opsion i dytë sipas këtij burimi është që partisë që del e para, mos t`i lejohet që më shumë se tri herë të propozoj emrin e kandidatit për kryetar të Kuvendit.
Dhe, opsioni i tretë – që duket se nuk mund të jetë fort real – është se Gjykata Kushtetuese të mos merret fare me këtë çështje duke e kthyer lëndën me ‘propozimin’ se për këtë çëshjte mund të procedohet edhe vazhdohet tutje bazuar në rregulloren e re të Kuvendit të Kosovës.
“Aktgjykimi pritet të dal javën e ardhshme”, tha ky burim i Periskopit.
Çka prodhon kjo situatë?
Në rast se Gjykata sipas të gjitha gjasave do t`i jap dritën jeshile votimit të fshehtë në Kuvend, atëherë bazuar në deklaratat e partisë që doli e para, Lëvizja Vetëvendosje, situata në Kuvend mund të zhbllokohet – meqë sipas tyre ka disa deputetë që do ta votnin kryetaren e Kuvendit përmes votimit të fshehtë.
“Peshkimi” i mundshëm i ndonjë deputeti nga Lëvizja Vetëvendosje mund të demaskohet në momentin që votohet përmes votimit të fshehtë.
“Delja e zezë” lehtësisht mund të identifikohet meqë partitë ish opozitare PDK – LDK – AAK në momentin që hidhet në votim të fshehtë zgjedhja e kryetarit të Kuvendit, ato do ta braktisin seancën duke lëshuar sallën.
Zyrtarë të partisë që drejtohet nga Albin Kurti disa herë kanë ‘testuar’ ish opozitën duke thënë se ta votojnë kandidaten për kryetare të Kuvendit, këtë rast Albulena Haxhiun, në mënyrë që të hapet rrugë për krijimin e Qeverisë së re, e për të cilën VV`ja disa herë ka thënë se numrat për Qeveri i kanë por jo edhe për kryetare të Kuvendit.
Përndryshe të enjten (19, qershor 2025) ka dështuar për herë të 34-të tentimi për të zgjedhur kryetarin e Kuvendit, meqë VV nuk i ka numrat, përderisa ish opozita ka qëndrimet e tyre se nuk kanë votë për Albulena Haxhiun.
Kërkesa në Gjykatë Kushtetuese është nisur nga AAK e mbështetur edhe nga disa deputetë të ish opozitës.
Aktgjykimi i Gjykatës Kushtetuese, me opsionet e përmendura më lartë do të krijonte një situatë të re politike.
E, ajo që me kushtetutë dhe ligjet në fuqi ka rolin unfikueses dhe e cila aktualisht ka legjitimit dhe mandat të plotë, presidentja Vjosa Osmani “po qëndron në breg” duke soditur situatën.
Pos një takimi me liderët e subjekteve politike parlamentare i cili nuk prodhoi asgjë, Osmani nuk ka bërë as edhe një lëvizje të vetme.
Nga zyra e saj, ditë më parë kanë thënë se e kanë të gatshme lëndën për të nisur në Kushtetuese kërkesën e Presidentës, por që sipas tyre po presin opinionin e Gjykatës Kushtetuese ndaj kërkesës së AAK dhe të tjerëve. / Periskopi/
