Drejtori i sapoemëruar i Autoritetit Portual të Durrësit, Liburn Aliu, ka reaguar pas prezantimit të tij zyrtar nga zv.kryeministrja dhe ministrja e Infrastrukturës, Belinda Balluku.
Në një deklaratë për media, Aliu u shpreh mirënjohës për besimin e dhënë nga kryeministri Edi Rama, duke theksuar se do të angazhohet maksimalisht për ta kthyer Portin e Durrësit në një qendër moderne dhe konkurruese në nivel rajonal.
“Faleminderit kryeministrit Rama për besimin dhe mbështetjen. Porti i Durrësit ka një rol të jashtëzakonshëm ekonomik për Shqipërinë dhe rajonin. Do të punojmë me përkushtim për ta çuar këtë projekt strategjik në një nivel të ri zhvillimi,” – deklaroi Aliu.
Emërimi i tij vjen në një moment kyç për përparimin e projekteve të mëdha infrastrukturore dhe bashkëpunimin Shqipëri–Kosovë në sektorin e transportit dhe logjistikës./QENDRA.INFO
