Kryeministri Edi Rama deklaroi se aksioni për lirimin e hapësirave publike nga ndërtimet e paligjshme po vijon në gjithë Shqipërinë. Përmes pamjeve të ndara në rrjete sociale, Rama tregoi se po çmontohen struktura metalike dhe po shemben platforma betoni të ngritura mbi trotuare, duke theksuar se ky proces do të vijojë sistematikisht.
“Jo vetëm ngrehinat e hekurit, por edhe platformat e ndryshme nën to do të zhbëhen hap pas hapi, përditë e me durim, derisa të vendoset kudo kufiri që garanton lirinë e hapësirës komunitare dhe përcakton deri ku mund të shtrihen tavolinat, karriget e çadrat e njësive tregtare”, – u shpreh Rama.
Sipas qeverisë, ky veprim është i domosdoshëm për përmirësimin e cilësisë së shërbimit dhe funksionimit të bizneseve, në përputhje me standardet e mikpritjes, jo vetëm në zonat turistike por në të gjithë vendin.
Ky aksion, i cili filloi në korrik, mbetet prioritet i pushtetit vendor dhe atij qendror në mbrojtje të interesit publik dhe të komuniteteve.
