Komisioneri i Drejtësisë i Bashkimit Evropian, Michael McGrath, ka reaguar ashpër ndaj shitjes së produkteve të rrezikshme nga platformat kineze Shein dhe Temu, duke shprehur tronditjen e tij për nivelin e rrezikut që përbëjnë disa nga këto mallra për konsumatorët evropianë, veçanërisht fëmijët.
Në fokus të reagimit të tij ishin produktet si biberonat me rruaza që shkëputen lehtë, të cilat mund të shkaktojnë mbytje te foshnjat, si dhe mungesa e vrimave të standardizuara që do t’i mundësonin një foshnje të nxirrte aksidentalisht ndonjë pjesë të gëlltitur. Po ashtu, u përmendën mushama për fëmijë që përmbajnë kimikate toksike, syze dielli pa filtër mbrojtës UV dhe pantallona për fëmijë me lidhëse më të gjata se norma e lejuar, që mund të shkaktojnë rrezik lëndimi.
McGrath tha se aktualisht po priten rezultatet e një operacioni të fshehtë blerjesh në gjithë BE-në, i cili synon të mbledhë prova shtesë për shkeljet nga këto platforma. Ai theksoi se 12 milionë pako hyjnë çdo ditë në tregun evropian nga platformat online, shumë prej tyre me mallra që nuk respektojnë standardet e sigurisë të BE-së.
Në një raport të publikuar këtë muaj nga eurodeputetët, u zbulua gjithashtu prania e përbërësve të ndaluar si butilfenil metilpropional (i njohur si Lillal) në produkte kozmetike të shitura nga Shein dhe Temu. Ky përbërës është i ndaluar në BE që nga viti 2022 për shkak të ndikimeve të mundshme në fertilitet dhe zhvillimin e fetusit.
“Jam i shokuar nga kjo dhe mendoj se kemi detyrë të mbrojmë konsumatorët evropianë”, tha McGrath për “The Guardian”, duke paralajmëruar masa të ashpra ndaj shitësve që anashkalojnë ligjet dhe rregulloret evropiane.
Sipas të dhënave zyrtare, vetëm vitin e kaluar sistemi “Safety Gate” i BE-së për produktet e rrezikshme regjistroi një rekord prej 4,137 alarmesh, ku më shumë se një e treta ishin për kozmetikë – përpara lodrave, pajisjeve elektrike dhe produkteve kimike.
