Ministri në detyrë i Mbrojtjes, Ejup Maqedonci, në një intervistë për transmetuesin polak TVP World, ka theksuar se lufta e Ushtrisë Çlirimtare të Kosovës ishte e drejtë dhe e pastër, ndërsa gjykimi ndaj ish-krerëve të saj në Hagë ka për qëllim minimin e shtetësisë së Kosovës dhe legjitimitetit të intervenimit të NATO-s.
“Bëra të qartë se Serbia po vazhdon të mbajë qasje hegjemoniste ndaj Kosovës dhe vendeve fqinje, duke zhvilluar luftë hibride dhe duke strehuar e mos dorëzuar pjesëtarët e grupit paramilitar që tentoi aneksimin e pjesës veriore të Kosovës dhe kreu akte terroriste kundër institucioneve tona,” tha Maqedonci.
Ai foli edhe për luftën në Ukrainë, duke theksuar mbështetjen që Kosova i ka dhënë dhe vazhdon t’i japë këtij vendi në betejën e tij për liri.
Maqedonci nënvizoi gjithashtu investimet e Qeverisë së Kosovës në forcimin e kapaciteteve mbrojtëse dhe ndërtimin e ushtrisë sipas standardeve të NATO-s, duke siguruar ndërveprueshmëri me aleatët.
Në fund, ai theksoi se Republika e Kosovës mbetet e vendosur në rrugën e saj drejt anëtarësimit në NATO dhe Bashkimin Evropian, si dhe në forcimin e vlerave demokratike.
