Pas një reagimi të madh publik lidhur me ndalimin e disa lojërave me përmbajtje për të rritur, Mastercard ka mohuar të ketë ushtruar presion ndaj platformave të lojërave. Në një deklaratë të shkurtër, kompania tha:
“Mastercard nuk ka vlerësuar ndonjë lojë dhe nuk ka kërkuar kufizime për ndonjë aktivitet në faqet apo platformat e krijuesve të lojërave, ndryshe nga sa pretendohet në media.”
Megjithatë, kompania shtoi se kërkon që tregtarët të kenë kontrolle për të ndaluar përdorimin e kartave Mastercard për blerje të paligjshme, përfshirë përmbajtjen e ndaluar për të rritur.
Kjo deklaratë erdhi pasi grupi aktivist Collective Shout u drejtua me një letër të hapur Mastercard-it, Paypal-it, Visa-s dhe kompanive të tjera, duke i akuzuar se kanë lejuar shitjen e lojërave si “No Mercy”, që përshkruajnë përdhunim, incest dhe abuzim seksual të të miturve.
Më pas, Steam njoftoi se do të ndalojë lojërat që shkelin rregullat e “procesuesve të pagesave dhe rrjeteve të kartave.” Edhe Itch.io hoqi lojërat me përmbajtje për të rritur nga rezultatet e kërkimit dhe filloi një auditim më të gjerë të përmbajtjes.
Ndërsa Mastercard mohon ndikimin e drejtpërdrejtë, Valve – kompania mëmë e Steam – dha një version tjetër. Për PC Gamer, ajo deklaroi se:
“Mastercard nuk ka komunikuar drejtpërdrejt me Valve, pavarësisht kërkesës sonë. Komunikimi është bërë përmes procesuesve të pagesave dhe bankave të tyre partnere. Ne u kemi sqaruar që politika jonë që nga viti 2018 është të shpërndajmë vetëm lojëra që janë të ligjshme.”
Por, sipas Valve, kjo përgjigje u refuzua nga procesuesit e pagesave, të cilët përmendën “rrezikun për imazhin e Mastercard” dhe një rregull që ndalon transaksionet “të paligjshme apo që dëmtojnë markën.”
Ndërkohë, Itch.io njoftoi se po rishfaq lojërat falas me përmbajtje për të rritur në platformë, ndërsa po negocion me procesues si Stripe. Stripe, nga ana e tij, thotë se nuk mund të mbështesë përmbajtje eksplicite për shkak të kufizimeve nga partnerët bankarë.
Përplasja midis kompanive të pagesave dhe platformave të lojërave thekson tensionin në rritje midis lirisë krijuese dhe rregullave të industrisë financiare.
