Në Gjilan u mbajt sot një mbledhje komemorative në nderim të veprimtarit të çështjes kombëtare, Ilmi Ramadani, i cili u nda nga jeta më 27 gusht 2025. Në këtë ceremoni përkujtimore morën pjesë familjarë, miq, bashkëveprimtarë e përfaqësues të institucioneve të vendit, të cilët shprehën nderimet dhe respektin për jetën dhe veprën e tij.
Në fjalët e tyre përshëndetëse, të pranishmit e vlerësuan Ramadanin si një figurë të shquar të lëvizjes kombëtare, që idealin për liri e mbajti mbi gjithçka. Ata kujtuan angazhimin e tij që nga vitet e hershme në “Grupin Revolucionar” së bashku me veprimtarë të njohur si Rexhep Mala, Kadri Zeka e Hydajet Hyseni, periudhat e shumta të burgut politik gjatë viteve ’70 e ’80, si dhe kontributin e tij të mëvonshëm në Këshillin për Mbrojtjen e të Drejtave dhe Lirive të Njeriut dhe në institucionet e Kosovës.
Veçanërisht u theksua roli i tij në radhët e Ushtrisë Çlirimtare të Kosovës gjatë viteve 1998–1999, ku luftoi deri në përfundimin e luftës. Pas çlirimit, Ilmi Ramadani u angazhua edhe në jetën shoqërore e politike, duke kontribuar si menaxher, këshilltar dhe intelektual i përkushtuar për të mirën e vendit.
