Një aksion i përbashkët i Drejtoria e Inspektimit dhe inspektorëve sanitarë të Ministrisë së Shëndetësisë ka rezultuar me mbylljen e përkohshme të disa bizneseve shëndetësore dhe gastronomike në Mitrovicën Veriore, përfshirë edhe kliniken “Hipokrat”, për shkak të mungesës së kushteve minimale të punës.
Gjatë këtij operacioni u kontrolluan dhjetëra subjekte, përfshirë ordinanca dentare, ambulanca gjinekologjike dhe poliklinika të paregjistruara, që sipas inspektorëve punonin pa leje, në kushte të papërshtatshme, ndërsa disa mjekë banonin në të njëjtat ambiente ku kryenin shërbime mjekësore.
Në rastin e klinikës “Hipokrat”, për të rifilluar punën, ajo duhet të:
-
transformohet në hapësirë të përshtatshme biznesi,
-
rregullojë instalimet elektrike dhe sanitare,
-
sigurojë nivel adekuat të higjienës,
-
pajiset me librezë sanitare, certifikata mjekësore, licencë të Ministrisë së Shëndetësisë, regjistrim afarist dhe pëlqim nga komuna.
Në vendngjarje janë asgjësuar ose caktuar për asgjësim mbi 30 produkte, përfshirë materiale mjekësore të ruajtura në mënyrë të pasaktë dhe produkte me afat të skaduar.
Autoritetet kanë paralajmëruar masa të reja ndëshkuese për subjektet që nuk respektojnë ligjet dhe standardet e shëndetësisë publike, si dhe masa të detyrueshme për legalizim dhe adaptim sanitar të ambienteve.
