At Gjergj Fishta lindi 154 vjet më parë, më 23 tetor të vitit 1871, në fshatin Fishtë të Zadrimës.
Ai konsiderohet si Homeri i letrave shqipe.
Mësimet e para i mori në seminarin françeskan të Shkodrës. Studimet e mëtejshme i ndoqi në Bosnje, në disiplinat e filozofisë dhe të teologjisë. Fishta qe drejtori i parë shqiptar i Shkollës Françeskane. Në drejtimin e tij u mundësua që shqipja të përdorej në katedër si gjuhë mësimi.
Si përfaqësues i shoqërisë “Bashkimi”, mori pjesë në Kongresin e Manastirit dhe, në cilësinë e kryetarit, drejtoi veprimtarinë e Komisionit të Alfabetit.
Në vitin 1913, themeloi revistën letrare-kulturore “Hylli i Dritës”.
Gjatë Luftës së Parë Botërore, bashkëthemeloi me Luigj Gurakuqin Komisinë letrare, që kishte për qëllim krijimin e gjuhës letrare kombëtare.
Gjatë vitit 1920 u caktua Sekretar i Përgjithshëm i delegacionit shqiptar në Konferencën e Paqes në Paris. Po atë vit u zgjodh deputet i Shkodrës dhe mori pjesë në Revolucionin e Qershorit 1924.
Për kontributin e dhënë në lëmin e edukimit, të letërsisë dhe të fesë, Fishta mori dekoratën “Foenix” (1931), si edhe u bë anëtar i Akademisë Italiane (1939).
Vepra që përjetësoi figurën e tij si krijues është epika “Lahuta e Malcis”, së cilës i kushtoi 40 vjet punë.
At Gjergj Fishta ndërroi jetë në Shkodër, më 30 dhjetor 1940.
Shtëpia ku ai banoi është kthyer në shtëpi-muze, dhe mbetet një nga objektet më të çmuara të trashëgimisë kulturore kombëtare. Ajo, që mban statusin monument kulture, është vendi ku poeti i madh kaloi periudhën e hershme të jetës së tij.
Në nder të kësaj figure të shquar të kombit, gjatë tetorit janë organizuar një sërë aktivitete letrare, kulturore e artistike kushtuar Fishtës.
/atsh/
