Ministria e Shëndetësisë, në bashkëpunim me Institutin Kombëtar të Shëndetësisë Publike të Kosovës (IKShPK), ka nisur fushatën sensibilizuese kundër kancerit të gjirit, me qëllim rritjen e ndërgjegjësimit dhe parandalimin e kësaj sëmundjeje që prek mijëra njerëz çdo vit.
Në ceremoninë e nisjes mori pjesë edhe kryeministri në detyrë i Kosovës, Albin Kurti, i cili deklaroi se motoja e fushatës për këtë vit është: “Me ty fillon parandalimi”. Ai theksoi rëndësinë e vetëkontrollit dhe kontrolleve të rregullta, duke shtuar se këto janë hapa vendimtarë drejt zbulimit të hershëm të sëmundjes dhe shpëtimit të jetës.
“Vetëkontrolli dhe kontrollet e rregullta janë çelësi për t’u përballur me kancerin e gjirit. Vetëm në vitin 2024 janë regjistruar 640 raste të reja, shumica gra, por edhe burra”, tha Kurti, duke vënë në pah se ndërgjegjësimi është përgjegjësi e të gjithë shoqërisë, jo vetëm e institucioneve.
Ministri në detyrë i Shëndetësisë, Arben Vitia, u shpreh se fushata synon të informojë publikun për rëndësinë e vetëkontrollit, kontrolleve të shpeshta dhe mamografisë. Ai njoftoi se kapacitetet për trajtimin e kancerit të gjirit janë dyfishuar, hapësirat janë modernizuar, dhe lista esenciale e barnave është përmirësuar për të përfshirë terapi të reja.
Nga vetëm katër operacione për rikonstruksion të gjirit në vitin 2021, numri ka arritur në 150 operacione në vitet e fundit, tha Vitia.
E mbijetuara e kancerit të gjirit, Nafije Latifi, u shpreh se tetori duhet të jetë jo vetëm muaj ndërgjegjësimi, por edhe muaj i veprimeve konkrete dhe investimeve serioze për përmirësimin e kujdesit ndaj pacientëve. Ajo shtoi: “Çdo jetë ka vlerë, çdo pacient ka të drejtë për shpresë dhe dinjitet.”
Deputetja Mimoza Kusari-Lila, e cila ka kaluar përvojën e luftës me kancerin e gjirit, bëri thirrje që çdo grua dhe vajzë të kryejë kontrolle periodike për të parandaluar dhe luftuar sëmundjen.
Motoja e këtij viti: “Me ty fillon parandalimi” është një apel i fuqishëm për gjithë shoqërinë, që të jetë pjesë e luftës kundër kancerit të gjirit.
