Pas një raporti investigativ nga Pro Publica, që zbuloi se kompania Microsoft kishte angazhuar inxhinierë nga Kina për mirëmbajtjen e sistemeve të cloud computing të Departamentit Amerikan të Mbrojtjes (DoD), kompania ka bërë të ditur se një praktikë e tillë nuk do të ndodhë më.
Sipas raportit, Microsoft kishte zbatuar një sistem me të ashtuquajtur “eskorta dixhitale” – qytetarë amerikanë me certifikata sigurie, të cilët mbikëqyrnin inxhinierët nga Kina. Megjithatë, Pro Publica thekson se shpeshherë këta mbikëqyrës nuk kishin njohuritë teknike të nevojshme për të kontrolluar në mënyrë të duhur punën e tyre.
Lidhur me këtë çështje, Sekretari amerikan i Mbrojtjes, Pete Hegseth, reagoi ashpër përmes platformës X (ish-Twitter):
“Inxhinierët e huaj – nga çdo shtet, përfshirë natyrisht Kinën – NUK duhet të lejohen kurrë të kenë akses apo të mirëmbajnë sistemet e Departamentit të Mbrojtjes.”
Në përgjigje të reagimeve, zëdhënësi kryesor i Microsoft-it, Frank X. Shaw, njoftoi të premten:
“Në përgjigje të shqetësimeve të ngritura këtë javë për inxhinierët e huaj të mbikëqyrur nga SHBA, Microsoft ka bërë ndryshime në mbështetjen që ofron për klientët e Qeverisë Amerikane, duke siguruar që asnjë ekip inxhinierësh me bazë në Kinë nuk do të ofrojë më ndihmë teknike për sistemet cloud të Departamentit të Mbrojtjes apo shërbime të ndërlidhura.”
Ky zhvillim vjen në një kohë kur çështjet e sigurisë kibernetike dhe ndikimi i kompanive të mëdha teknologjike në infrastrukturën qeveritare amerikane janë nën vëzhgim të shtuar.
