Prishtinë — Deputetja dhe ish-zyrtarja e lartë, Mimoza Kusari, ka reaguar sot pas publikimit të një shkrimi në gazetën zvicerane Neue Zürcher Zeitung (NZZ) dhe disa portaleve kosovare, ku raportohej për takime “të fshehta” mes zëvendëskryeministrit të Kosovës, Besnik Bislimi, dhe kryediplomatit serb, Marko Gjuriq, në qytetin zviceran Solothurn.
Në një postim të bërë pak minuta më parë në rrjetet sociale, Kusari i ka quajtur këto raporte “lajm i rremë”, duke theksuar se ata që i kanë shpërndarë kanë vazhduar me të njëjtin “zell” edhe përkundër faktit që, sipas saj, ekzistojnë fakte të qarta që demantojnë narrativën e paraqitur. Ajo i ka cilësuar publikimet jo si gazetari, por si papërgjegjësi.
Reagimi i Kusarit vjen pas raportimeve se gazeta zvicerane NZZ ka publikuar një artikull sipas të cilit Shteti Zviceran organizon takime joformale midis Kosovës dhe Serbisë, ku takimet dyshohet se përfshijnë edhe përfaqësues të lartë nga të dyja vendet. Artikulli pretendon se këto takime nuk janë bërë publike më parë, megjithëse disa raporte ekzistojnë që nga viti 2022.
Ndërkohë, zyrtarë të qeverisë në detyrë kanë mohuar se ka pasur ndonjë takim të tillë midis Bislimit dhe Gjuriqit në Zvicër, duke deklaruar se zëvendëskryeministri kosovar nuk ka zhvilluar asnjë takim të tillë dhe se raportimet janë të pasakta.
Kusari ka bërë thirrje për informim të drejtë dhe të verifikuar, duke vënë në dukje rëndësinë e gazetarisë së përgjegjshme dhe të bazuar në fakte, veçanërisht kur bëhet fjalë për çështje me peshë politike dhe diplomatike./Qendra.INFO
