Prof. dr. Serhat Birengel, kreu i Departamentit të Sëmundjeve Infektive në Universitetin e Ankarasë, ka paralajmëruar për rreziqet shëndetësore që sjell ekspozimi i drejtpërdrejtë ndaj ajrit të kondicionuar, sidomos gjatë verës.
Sipas tij, përdorimi i kondicionerëve në temperatura shumë të ulëta dhe kalimet e menjëhershme nga i nxehti në të ftohtë dobësojnë sistemin imunitar dhe rrisin rrezikun për infeksione, përfshirë pneumoninë e shkaktuar nga bakteret legionella.
“Ekspozimi i drejtpërdrejtë ndaj ajrit të kondicionuar, sidomos kur jemi të djersitur, krijon kushte të favorshme për infeksione respiratore”, tha Birengel për Anadolu.
Ai rekomandon që temperatura ideale në ambiente pune të jetë 18–21°C dhe të shmangen ndryshimet e papritura të temperaturës, veçanërisht për personat me alergji apo probleme me sinuset. Rreziqe të ngjashme paraqesin edhe kondicionerët në automjete.
Mjeku turk theksoi gjithashtu se gjatë verës shtohen edhe infeksionet gastrointestinale si pasojë e konsumimit të pijeve të ftohta, ujit nga burime të pasigurta apo ushqimeve të përgatitura në ambiente jo të higjienizuara.
Këshilla praktike:
Mos u poziciononi përballë ajrit të kondicionuar.
Shmangni konsumimin e pijeve të ftohta ekstreme.
Mbani ambientet e punës në temperaturë të moderuar.
Pini ujë të sigurt dhe shmangni burimet e pasigurta.
Shëndeti gjatë verës kërkon kujdes të shtuar – ekspozimi ndaj ajrit të kondicionuar mund të jetë më i rrezikshëm sesa mendohet.
