Prishtinë, 6 Tetor 2025 – Ndërmarrja publike “Termokos” ka bërë të ditur se është në përfundim të përgatitjeve për të filluar furnizimin me ngrohje për të gjithë konsumatorët, përfshirë institucionet arsimore dhe objektet banesore në Prishtinë.
Zëdhënësja e Termokosit, Afërdita Uka, ka deklaruar për gazetën Koha se furnizimi me ngrohje mund të nisë edhe para afatit ligjor të zakonshëm për fillimin e sezonit të ngrohjes.
“Janë në përfundim përgatitjet për fillimin e furnizimit me ngrohje për gjithë konsumatorët tanë. Jemi në koordinim të ngushtë me KEK-un dhe tashmë është bërë kërkesa për furnizim me energji termike. Pra, ashtu siç edhe kemi paralajmëruar, ne jemi të gatshëm që të fillojmë furnizimin me ngrohje para afatit ligjor të zakonshëm për sezonin e ri ngrohës 2025/2026”, ka thënë Uka.
Ndërkohë, disa shkolla të Prishtinës që janë të kyçura në rrjetin e Termokosit janë duke zhvilluar mësim me orar të shkurtuar për shkak të mungesës së ngrohjes, në ditët kur temperaturat kanë rënë ndjeshëm.
