Prishtinë, 28 tetor 2025 — Raportime të publikuara nga portali Nacionale pretendojnë se Blinera Osmani, motra e presidentes së Kosovës, Vjosa Osmani, është licencuar si avokate në Odën e Avokatëve të Kosovës (OAK) pa plotësuar të gjitha kushtet ligjore të kërkuara për këtë proces.
Sipas burimeve të njëjta, një ndër kushtet e domosdoshme për t’u licencuar si avokat është paraqitja e vërtetimit të papunësisë — dokument që lëshohet nga Agjencia e Punësimit e Republikës së Kosovës, dhe që dëshmon se aplikanti nuk është në marrëdhënie pune në momentin e aplikimit.
Oda e Avokatëve ka konfirmuar se ky dokument është pjesë e detyrueshme e aplikacionit, përveç dokumenteve të tjera standarde.
Megjithatë, sipas dokumenteve të siguruara nga Nacionale, Blinera Osmani nuk e ka dorëzuar këtë vërtetim në OAK, ndonëse tashmë figuron në listën zyrtare të avokatëve të licencuar.
Në të njëjtën kohë, portali raporton se ajo i është drejtuar Agjencisë së Punësimit më 18 korrik 2023 me kërkesë për t’u pajisur me këtë vërtetim, por nuk dihet nëse dokumenti është pranuar apo jo në kohë nga Oda.
Derisa Oda e Avokatëve nuk ka dhënë ende ndonjë deklaratë zyrtare për rastin konkret, publikimi ka ngritur pyetje mbi transparencën dhe barazinë e trajtimit të aplikantëve për licencim si avokatë në Kosovë.
