Një studim i ri i publikuar në revistën Nature Metabolism ka zbuluar një lidhje të pazakontë mes muajit të lindjes dhe mënyrës se si trupi ynë ruan yndyrën. Sipas shkencëtarëve, temperatura e mjedisit gjatë lindjes – apo edhe gjatë ngjizjes – mund të luajë një rol të rëndësishëm në zhvillimin e indit dhjamor dhe metabolizmit në moshë madhore.
Studiuesit analizuan të dhënat e 683 personave të moshës nga 3 deri në 78 vjeç, duke vëzhguar aktivitetin e indit dhjamor kafe, një lloj yndyre që është aktiv kryesisht te foshnjat dhe që ndihmon trupin të gjenerojë nxehtësi në klimat e ftohta.
“Individët që janë ngjizur ose lindur gjatë muajve të ftohtë tregojnë aktivitet më të lartë të indit dhjamor kafe, shpenzim më të madh të energjisë dhe kanë indeks më të ulët të masës trupore (BMI) në moshë të rritur,” thuhet në përfundimet e studimit.
Në të kundërt, ata që kanë lindur në muaj më të ngrohtë kanë më shumë gjasa të zhvillojnë indi dhjamor të bardhë, i cili shërben si rezervë energjie dhe lidhet me një akumulim më të madh të yndyrës trupore.
Ky zbulim sugjeron se ekspozimi ndaj temperaturës në momentet më të hershme të jetës mund të ketë ndikim afatgjatë në mënyrën se si trupi ruan dhe përdor yndyrën, duke ndikuar potencialisht në rrezikun për mbipeshë apo probleme metabolike më vonë në jetë.
Studiuesit synojnë që përmes hulumtimeve të ardhshme të thellojnë më tej këtë lidhje mes klimës, gjenetikës dhe metabolizmit njerëzor.
