Pejë, 20 tetor 2025 – Janë numëruar 100% e votave të ardhura me postë për komunën e Pejës, dhe rezultati konfirmon se kandidati i Lidhjes Demokratike të Kosovës (LDK), Gazmend Muhaxheri, vazhdon të mbajë epërsinë ndaj rivalëve politikë.
Sipas të dhënave të publikuara nga Komisioni Qendror i Zgjedhjeve (KQZ), Muhaxheri – i cili aktualisht udhëheq komunën e Pejës – ka siguruar 48.55% të votave të diasporës.
Pas tij renditet kandidati i Lëvizjes Vetëvendosje (VV), Taulant Kelmendi, me 26.37% të votave me postë.
Rezultatet e përmbledhura të KQZ-së tregojnë se Muhaxheri mban epërsinë edhe në total, me 46.23% të votave të numëruara deri më tani, ndërsa Kelmendi vijon në vendin e dytë me 27.81%.
Këto rezultate e vendosin LDK-në në një pozitë të favorshme për balotazhin në Pejë, ndërkohë që procesi i numërimit pritet të përmbyllet pas certifikimit zyrtar nga KQZ-ja./Qendra.INFO
