PARIS – Muzeu Picasso në Paris, 40 vjet pas hapjes së tij, do të kalojë në një rikonstruksion të madh me vlerë prej 50 milionë eurosh, me qëllim zgjerimin e hapësirave për ekspozita të përkohshme dhe riidezajnimin e kopshtit, sipas raportimeve të “Le Monde”.
Projekti ambicioz, i quajtur “Picasso 2030”, u prezantua nga drejtoresha e muzeut, Cécile Debray, gjatë një eventi në mbrëmje. Ajo theksoi se synimi është rivendosja e pozicionit qendror të muzeut në skenën kulturore të Parisit dhe përmirësimi i përvojës për vizitorët.
Muzeu, i vendosur në ndërtesën historike “Hôtel Salé”, do të modernizohet duke ruajtur integritetin arkitektonik të saj, ndërkohë që do të shtohen hapësira të reja për të shfaqur koleksionin më të madh në botë të veprave të Picasso-s.
Rinovimi do të mbulohet nga Fondacioni i Muzeut dhe trashëgimtarët e artistit, duke treguar përkushtimin e tyre për ruajtjen e trashëgimisë kulturore të Pablo Picasso-s.
Koha e këtij projekti përkon me rinovimin e madh të Qendrës Pompidou, i cili pritet të përfundojë deri në vitin 2030, duke treguar një strategji të gjerë për përmirësimin e institucioneve kryesore kulturore të Parisit.
Ky investim do t’i japë muzeut një pamje moderne dhe funksionale, duke e kthyer atë në një pikë reference jo vetëm për artdashësit, por edhe për turizmin dhe kulturën franceze.
Për më shumë lajme të reja ndiqni qendra.info.
