Aktivistja serbe për të drejtat e njeriut, Natasha Kandiq, ka reaguar ashpër pas arrestimit të Fatmir Shehollit, i cili dyshohet për spiunazh në shërbim të Serbisë. Përmes një deklarate, Kandiq e ka cilësuar këtë veprim si “të turpshëm” dhe ka kërkuar nga Prokuroria që të paraqesë publikisht provat që e justifikojnë këtë arrestim.
“Sheholli njihet për angazhimin e tij në dialogun ndërmjet shqiptarëve dhe serbëve. Arrestimi i tij si ‘spiun i Serbisë’ është i turpshëm”, është shprehur Kandiq, duke vënë në dyshim bazën ligjore dhe motivet prapa këtij veprimi.
Ajo ka theksuar rëndësinë e transparencës dhe të drejtës për një proces të rregullt gjyqësor, duke apeluar që organet e drejtësisë të mos lejojnë që rastet e tilla të kthehen në instrumente presioni politik.
Fatmir Sheholli është arrestuar sot nga autoritetet e Kosovës, nën dyshimet për bashkëpunim me shërbimet inteligjente serbe. Rasti ka shkaktuar reagime të shumta në opinionin publik dhe atë politik.
