Passau, Gjermani – 23 tetor 2025 – Një 42-vjeçar nga Kosova është ndaluar nga autoritetet gjermane në qytetin e Passaut, pasi po transportonte një kufomë në drejtim të Bullgarisë me një furgon që nuk kishte certifikim zyrtar si automjet funerali.
Sipas mediave gjermane, ngjarja ka ndodhur të mërkurën, më 22 tetor, rreth orës 17:30, kur oficerët e Inspektoratit të Policisë Kufitare të Passaut ndaluan një furgon me targa gjermane në autostradën A3, në drejtim të Austrisë. Gjatë kontrollit, policët zbuluan një arkivol me një trup të pajetë në pjesën e pasme të automjetit.
Shoferi kosovar ka deklaruar se po transportonte trupin nga Luksemburgu drejt Bullgarisë për një ceremoni funerale dhe kishte me vete të gjitha dokumentet e nevojshme për transportin ndërkombëtar të kufomës. Megjithatë, autoritetet konstatuan se furgoni nuk ishte i certifikuar si automjet funerali, siç kërkohet nga Ordinanca e Funeraleve në Gjermani.
Policia ndaloi udhëtimin derisa të mbërrinte një automjet zëvendësues i certifikuar, ndërsa ndaj shoferit është iniciuar procedurë administrative për kundërvajtje në bazë të Akti të Varrimit.
