Pas suksesit të dokumentarit “Beckham” në Netflix, këtë vit platforma vjen me një tjetër rrëfim të thellë – këtë herë kushtuar Victoria Beckham, një prej figurave më intriguese të showbizit britanik. Dokumentari i ri zbulon sfidat, transformimet dhe betejat e saj personale në rrugën nga një yll i muzikës pop te një ikonë e respektuar e modës botërore.
Pas performancës së fundit me Spice Girls në vitin 2000, Victoria ndodhej në një pikë kthese.
“Jeta më dukej e ngadaltë, ndihesha e vetmuar. Nuk e dija çfarë të bëja më,” – rrëfen ajo në dokumentar.
E martuar me David Beckham që prej vitit 1999 dhe nënë e re, Victoria përballej me presionin publik për pamjen e saj dhe me betejat e heshtura me çrregullime në ushqyerje.
“Fillova të kontrolloja peshën në mënyrë të pashëndetshme. Nuk kam qenë kurrë e sinqertë për këtë, as me prindërit,” – tregon ajo me sinqeritet.
Në vitin 2003, pas zhvendosjes së familjes në Spanjë, mes thashethemeve për martesën dhe pasigurisë profesionale, ajo vendosi të ndërtonte një markë të vetën në botën e modës. Megjithëse u përball me skepticizëm dhe refuzime nga figura të njohura si Anna Wintour, ajo nuk u dorëzua. Me kalimin e viteve, Victoria fitoi respektin e industrisë, por rruga drejt suksesit nuk ishte e lehtë.
Marka “Victoria Beckham” përjetoi humbje të mëdha financiare deri në vitin 2016, duke e çuar biznesin në prag të falimentimit. Vetëm pas një investimi të rëndësishëm në vitin 2017, situata nisi të ndryshonte.
“Në atë kohë nuk e kuptoja, por isha jashtëzakonisht e shthurur me paratë. Lejova që të ndodhte. Mendoj se pjesë e problemit ishte që njerëzit kishin frikë të më thoshin ‘jo’,” – pranoi ajo më vonë.
Sipas Fashion Network, marka doli përfundimisht nga humbjet në vitin 2022, duke shënuar një kthesë të madhe për stilisten britanike. Sot, Victoria Beckham shihet si shembull i qëndrueshmërisë, përulësisë dhe forcës për t’u ringritur, duke provuar se pas çdo dështimi mund të fshihet një fillim i ri.
