Amina Nuraj, figura e njohur kombëtare nga Sanxhaku, e cila drejton zyrën e Këshillit Kombëtar Shqiptar në Novi Pazar – organ që udhëhiqet nga kryetari Enkel Rexhpi me seli në Bujanoc – sapo është bërë pjesë e Lëvizjes Vetëvendosje në Mitrovicë.
Në një mesazh publik, ajo falënderoi kryeministrin Albin Kurti, që sipas saj ishte politikani i parë në Kosovë që e quajti “heroinë të kombit shqiptar” dhe që e prezantoi para popullit si zë të fortë të shqiptarëve të Sanxhakut. Me mbështetje edhe nga deputeti Armend Muja dhe aktivistet Agnesa Calakoviq e Aida Ferati Doli, Nuraj u zotua të jetë një zë i fuqishëm për bashkëkombasit e saj.
Por vetëm pak ditë pas këtij momenti politik, Amina shpërtheu në rrjete sociale: edhe pse ka aplikuar për shtetësi kosovare, institucionet nuk ia japin. “Nuk e di pse jam kaq e keqe për institucionet e Kosovës dhe për vetë shtetin e Kosovës, saqë edhe pasi aplikoj për shtetësi, nuk më japin shtetësi… 💔”, shkroi ajo.
Një paradoks që ka ndezur debat: një grua që përfaqëson shqiptarët e Sanxhakut, udhëheq një zyrë të Këshillit Kombëtar Shqiptar dhe tashmë është pjesë e Vetëvendosjes, por ende nuk gëzon as të drejtën bazë – shtetësinë e Kosovës. Edhe më kontradiktore është se Amina harron faktin që shteti i Kosovës udhëhiqet pikërisht nga Albin Kurti, njeriu që ajo lavdëroi publikisht disa ditë më parë, dhe se institucionet që po kritikon drejtohen nga e njëjta Lëvizje Vetëvendosje në të cilën ajo sapo aderoi.
