Bllokada politike në Kosovë po sjell pasoja të mëdha për shtetin
Ngërçi institucional në Kuvendin e Kosovës, që ka çuar në 46 përpjekje të dështuara për konstituim, ka nisur të tërheqë vëmendjen e mediave ndërkombëtare. Gazeta gjermane Frankfurter Rundschau, në një artikull të gazetarit Thomas Roser, ka analizuar situatën politike në Prishtinë, duke i adresuar pjesë të fajit edhe kryeministrit në detyrë dhe liderit të Vetëvendosjes, Albin Kurti.
Artikulli përmend gjithashtu protestën simbolike me gomarë të organizuar disa ditë më parë nga avokati Arianit Koci, i cili kishte deklaruar:
“Njerëzit po trajtohen si gomarë nga përfaqësuesit e tyre”.
Ndërkohë, tentativa e 47-të për konstituimin e Kuvendit pritet të ndodhë sot nga ora 11:00, ndërsa përpjekja e 50-të mund të ndodhë të dielën, nëse situata vazhdon pa zgjidhje.
Pa kompromis dhe pa progres
Sipas gazetës gjermane, bllokada ka ardhur për shkak të mungesës së gatishmërisë për kompromis nga ana e VV-së, e cila insiston në kandidaturën e ish-ministres Albulena Haxhiu për kryetare të Kuvendit, pavarësisht se ajo nuk ka arritur të sigurojë shumicën e nevojshme prej 61 votash në asnjë nga përpjekjet e deritanishme.
“VV nuk ka bërë asnjë përpjekje për ta zëvendësuar kandidaten e saj, ndonëse ajo ka dështuar vazhdimisht,” shkruan gazeta.
Pasojat e bllokadës: Inflacion, paralizë institucionale, mungesë legjislacioni
Artikulli thekson se bllokada po shkakton pasoja serioze për vendin:
-
Asnjë ligj i ri nuk është miratuar
-
Nuk janë ratifikuar marrëveshje ndërkombëtare
-
Nuk janë emëruar drejtues të institucioneve shtetërore
-
Inflacioni ka arritur në 4.3% në qershor, niveli më i lartë në dy vitet e fundit
Afati përfundimtar: 28 korrik
Sipas Gjykatës Kushtetuese të Kosovës, Kuvendi duhet të konstituohet deri më 28 korrik 2025. Nëse kjo nuk ndodh, vendi përballet me rrezikun e zgjedhjeve të parakohshme, por për ironi, parlamenti duhet më parë të konstituohet për të shpërndarë veten.
