Duke e përforcuar mesazhin që ndau në blogun e tij mëngjesin e sotëm, ku foli për “superinteligjencën”, CEO i Meta-s, Mark Zuckerberg, shpalosi më tej idetë e tij optimiste se syzet do të jenë mënyra kryesore për të ndërvepruar me inteligjencën artificiale (AI) në të ardhmen. Gjatë raportimit për fitimet e tremujorit të dytë të kompanisë, Zuckerberg tha se njerëzit që nuk do të kenë syze me AI do të jenë në një disavantazh të theksuar.
“Vazhdoj të mendoj se syzet do të jenë forma ideale për AI-në, sepse i mundësojnë një inteligjence artificiale të shohë çfarë sheh ti gjatë ditës, të dëgjojë çfarë dëgjon ti dhe të flasë me ty,” tha Zuckerberg gjatë thirrjes me investitorët.
Sipas tij, shtimi i një ekrani në këto syze do të sjellë edhe më shumë përfitime — qoftë në formën e një pamjeje holografike të gjerë si tek Orion AR (syzet e realitetit të shtuar të Meta-s që priten së shpejti), apo në një ekran më të vogël që mund të përdoret në syze të përditshme.
“Në të ardhmen, nëse nuk ke një mënyrë për të ndërvepruar me AI-në përmes syzeve, do të jesh ndoshta në një disavantazh të konsiderueshëm kognitiv krahasuar me të tjerët,” shtoi ai.
Meta ka investuar në zhvillimin e syzeve inteligjente, si Ray-Ban Meta dhe më së fundmi Oakley Meta. Këto syze i lejojnë përdoruesit të dëgjojnë muzikë, të marrin foto e video, si dhe të bëjnë pyetje drejtuar Meta AI, madje edhe për objekte që po shohin në moment. Këto produkte rezultuan të jenë një sukses i papritur për kompaninë, pasi të ardhurat nga shitjet e Ray-Ban Meta janë rritur më shumë se trefishi nga viti në vit, sipas kompanisë EssilorLuxottica.
Megjithatë, Zuckerberg thekson se potenciali i syzeve nuk është shfrytëzuar plotësisht pa integrimin e ekraneve dixhitale.
“Kjo është ajo që kemi hulumtuar për 5 deri në 10 vitet e fundit me Reality Labs,” tha ai.
Përkundër vizionit të tij optimist, divizioni Reality Labs i Meta-s ka qenë një humbës i madh financiar. Vetëm gjatë tremujorit të dytë, ky sektor raportoi humbje operative prej 4.53 miliardë dollarësh. Që nga viti 2020, Reality Labs ka humbur gati 70 miliardë dollarë në total.
Sidoqoftë, nuk është e thënë që e ardhmja e AI konsumatorit do të jetë patjetër përmes syzeve. Në pranverë, OpenAI bleu startup-in e ish-dizajnerit të Apple, Jony Ive, për 6.5 miliardë dollarë me synim krijimin e pajisjeve të reja për ndërveprim me AI-në. Edhe startupe të tjera kanë eksperimentuar me forma të ndryshme si aksesore të varur në trup (AI pins, pendente), siç janë produktet e Humane (që rezultoi dështim), Limitless apo Friend.
Aktualisht, syzet duken si opsioni më praktik, pasi shumë njerëz i përdorin tashmë dhe ato janë të pranueshme socialisht. Por siç tregon historia me smartfonët, shpeshherë nuk e dimë se çfarë na mungon derisa dikush e shpik atë.
Megjithatë, Zuckerberg vazhdon të jetë entuziast për të ardhmen e syzeve:
“Ajo që është fantastike te syzet është se ato do të jenë mënyra ideale për të ndërthurur botën fizike me atë dixhitale,” tha ai. “Vizoni i Metaversit do të bëhet jashtëzakonisht i rëndësishëm, dhe AI do ta përshpejtojë këtë proces.”
