Presidentja e Kosovës, Vjosa Osmani, nga Kopenhaga ka kërkuar që Bashkimi Evropian të ndërmarrë veprime konkrete ndaj Serbisë, dy vjet pas sulmit terrorist në Banjskë.
“Posa shënuam 2-vjetorin e agresionit serb në shtetin tim, në veri të shtetit tim. Bashkimi Evropian në vazhdimësi ka bërë thirrje për përgjegjësi, por deri tani ka pasur zero përgjegjësi. Është koha për të vepruar në atë që thuhet – walk the talk”, tha Osmani para mediave.
Ajo theksoi se kërcënimet kryesore të sigurisë për kontinentin mbeten Rusia dhe Serbia. Sipas saj, Serbia po kopjon politikat agresive të Moskës, duke e trajtuar Kosovën dhe fqinjët e tjerë si shtete “joekzistente”.
“Serbia është kopje e lojës ruse, e për fat të keq e mbështetur nga vetë Rusia. Rusia flet për ‘botën ruse’, Serbia për ‘botën serbe’, duke përdorur të njëjtat metoda”, deklaroi presidentja.
Osmani paralajmëroi se mungesa e ndikimit perëndimor në rajon po hap hapësirë për aktorë të dëmshëm si Rusia, Kina dhe Irani, ndërsa theksoi se zgjerimi i BE-së në Ballkanin Perëndimor është thelbësor për stabilitetin.
