Presidentja e Kosovës, Vjosa Osmani, ka deklaruar se në fund të muajit maj institucionet e sigurisë kanë pranuar informacione të besueshme për veprime të Serbisë pranë kufirit me Kosovën.
Para mediave, Osmani bëri të ditur se pas marrjes së këtyre informacioneve, institucionet e vendit kanë vepruar në koordinim të plotë me aleatët, duke marrë masat e nevojshme për të garantuar sigurinë.
“Këto janë informacione të besueshme nga institucionet tona të sigurisë. Pas marrjes së tyre, kemi ndërmarrë të gjitha veprimet përkatëse në bashkëpunim me aleatët tanë”, tha Osmani.
Ajo shtoi gjithashtu se është vërejtur shtim i prezencës së KFOR-it në zonat kufitare.
Lidhur me deklaratat e autoriteteve serbe, Osmani i quajti ato pjesë të propagandës së zakonshme.
“Deklarimet e Serbisë se nuk dëshirojnë përshkallëzim janë propagandë. Fjalë të tilla i kanë përdorur edhe para agresionit në Banjskë në vitin 2023 dhe sulmit në Ibër-Lepenc”, theksoi presidentja.
