Lëvizja Vetëvendosje si subjekti më i madh politik i dalë nga zgjedhjet e fundit ka thënë se do t’i pranojë vendimet e Gjykatës Kushtetuese, mirëpo një skenar i mundshëm del të jetë i papranueshëm për këtë parti.
Artan Abrashi, deputet i VV-së, tha se këtu bënë përjashtime nëse hipotetikisht në vendimin e Gjykatës që pritet ta marrë këtyre ditëve i merret e drejta subjektit të parë që ta bëjë propozimin për kryetar të Kuvendit.
“Çfarëdo mase që parasheh Gjykata Kushtetuese për ne është e pranueshme përveç nëse ajo i zhbënë vendimet e saja të mëparshme nëse hipotetikisht nëse e anulon vendimin e saj paraprak ku e drejta e partisë së parë për të propozuar kryetarin e Kuvendit kalon tek i dyti. Kjo do të ishte një shkallmim i rendit të gjërave”, tha Abrashi për rtv21
Kushtetuesja pritet që më 8 gusht të dalë me një njoftim të ri sa i përket situatës së krijuar në vend, ndërsa puna e Kuvendit është pezulluar që nga 26 korriku.
