Mitrovicë e Veriut, 2 Tetor 2025 — Pas largimit të instalacionit me mbishkrimin “E dua Mitrovicën e K.” në cirilik dhe me motive të flamurit serb, reagimi nga drejtori i ashtuquajturës Zyrë Serbe për Kosovën, Petar Petkoviq, nuk vonoi.
Instalacioni ishte zëvendësuar me një tjetër mbishkrim që përmbante një zemër të gjelbër, shkronja latine dhe stemën e qytetit, duke shkaktuar reagime të forta politike.
Petkoviq deklaroi se largimi i simboleve serbe është “fytyra e Vjosa Osmanit dhe Albin Kurtit”, duke akuzuar institucionet e Kosovës për shtypje dhe diskriminim. “Ik Vjosa! Dëbimi i serbëve, arrestimet politike, përdhosja e varrezave serbe, militarizimi i veriut, kryetarët e rremë, dhuna institucionale, ndjekja e Listës Serbe, ndalimi i simboleve serbe — kjo është fytyra e Vjosës dhe Kurtit! Tani u pengon edhe mbishkrimi KM në cirilik! Jo edhe për shumë kohë”, shkroi Petkoviq në rrjetin social “X”.
Reagimi i tij erdhi menjëherë pas një deklarate të Presidentes Vjosa Osmani në Samitin e Komunitetit Politik Evropian, ku ajo theksoi se Serbia përbën kërcënim për stabilitetin në rajon dhe po ndjek një koncept të ngjashëm me atë rus.
Ngjarja thekson tensionet në veri të Kosovës, veçanërisht lidhur me simbolet, gjuhën dhe ndikimin politik nga Serbia.
