Parlamenti Studentor i Universitetit “Haxhi Zeka” në Pejë ka ndarë mirënjohje akademike për Prof. Asoc. Dr. Petrit Nimani, duke e shpallur atë Profesor të Vitit 2025.
Ky vlerësim i është dhënë për kontributin e jashtëzakonshëm akademik, profesional dhe institucional të Prof. Nimanit, i cili aktualisht mban pozitën e Dekan i Fakultetit Juridik. Sipas Parlamentit Studentor, angazhimi i tij i palodhur, udhëheqja vizionare dhe përkushtimi i vazhdueshëm kanë pasur rol kyç në konsolidimin dhe avancimin e Fakultetit Juridik si njësi akademike me standarde të larta.
Veprimtaria akademike dhe institucionale e Prof. Nimanit ka ndikuar drejtpërdrejt në rritjen e cilësisë së arsimit universitar, forcimin e kapaciteteve institucionale dhe zhvillimin profesional të studentëve, duke lënë gjurmë të qëndrueshme në jetën akademike të universitetit.
Ky çmim pasqyron mirënjohjen dhe respektin e studentëve dhe të gjithë komunitetit akademik për kontributin e tij të çmuar në ngritjen e arsimit të lartë dhe formimin e profesionistëve të së ardhmes./Qendra.INFO
