Platforma X ka nisur një projekt pilot për përfshirjen e inteligjencës artificiale në procesin e krijimit të Shënimeve të Komunitetit, në përpjekje për të rritur efikasitetin dhe saktësinë në verifikimin e përmbajtjes.
Sipas njoftimit zyrtar, tashmë janë vënë në dispozicion mjetet e para për zhvilluesit që dëshirojnë të krijojnë versionet e para të “Shkruesve të AI-së”. Këto shënime do të përdoren vetëm për testim, dhe nuk do të publikohen menjëherë. Ato do të kalojnë fillimisht përmes kontrollit automatik, për të vlerësuar përkatësinë, saktësinë dhe përmbajtjen e mundshme të papërshtatshme, dhe më pas do të kërkojnë miratim nga sistemi i vlerësimit të komunitetit përpara se të shfaqen publikisht.
Përdoruesit e parë që do të testojnë këtë funksion do të përzgjidhen dhe miratohen brenda muajit korrik, ndërsa publikimi i parë i shënimeve të krijuara nga AI pritet të nisë menjëherë pas kësaj faze.
“Ky sistem mund të përshpejtojë procesin dhe të zgjerojë ndikimin e Shënimeve të Komunitetit,” thuhet në deklaratën e X, duke theksuar se reagimet e përdoruesve do të jenë vendimtare për përmirësimin e algoritmit.
Shënimet e krijuara nga AI do të aplikohen vetëm për postime që tashmë janë përzgjedhur si të përshtatshme për këtë lloj vlerësimi, dhe çdo përmbajtje e gjeneruar nga AI do të etiketohet qartë për transparencë.
Megjithëse thuhet se “njerëzit mbeten përgjegjës”, duket se ndërhyrja njerëzore do të jetë e kufizuar vetëm në sistemin e vlerësimit, pa një redaktim të drejtpërdrejtë para publikimit të përmbajtjes.
Ky hap shihet si një etapë kyçe në zhvillimin e sistemeve të automatizuara për verifikimin e informacionit në rrjetet sociale.
