16 Tetor 2025 | Prishtinë
Një incident është raportuar sot paradite pranë Ambasadës Amerikane në Prishtinë, ku për disa minuta u bllokua qarkullimi në rrugën “Ahmet Krasniqi” pas një rasti të dyshuar kanosjeje.
Zëdhënësi i Policisë për rajonin e Prishtinës, Enis Pllana, konfirmoi për Periskopin se policia ka ndërhyrë menjëherë pas marrjes së informatës rreth orës 11:00 dhe ka arrestuar një person të dyshuar, i cili aktualisht ndodhet nën intervistim.
“Sot rreth orës 11:00 kemi pranuar informatën për një rast kanosje në rrugën ‘Ahmet Krasniqi’ në Prishtinë. Njësitet policore janë angazhuar menjëherë dhe kanë arrestuar një person të dyshuar, i cili është duke u intervistuar,” – tha Pllana.
Sipas informacioneve fillestare, rasti është trajtuar me kujdes për shkak të afërsisë me objektin diplomatik, ndërsa hetimet po vazhdojnë për të sqaruar motivet dhe rrethanat e incidentit.
Policia ka paralajmëruar se detaje të tjera do të bëhen publike pasi të përfundojë faza e parë e hetimeve./Qendra.INFO
