Policia britanike ka arrestuar katër persona lidhur me një protestë pro-palestineze në bazën ajrore të Forcave Ajrore Mbretërore (RAF) në Brize Norton, Oxfordshire, ku më 20 qershor aktivistë të grupit Palestine Action depërtuan dhe vandalizuan dy avionë ushtarakë.
Sipas Policisë për Luftimin e Terrorizmit në Juglindje (CTPSE), një grua 29-vjeçare dhe dy burra të moshës 36 dhe 24 vjeç u arrestuan të premten nën dyshimin për “përgatitje apo kryerje të akteve terroriste”. Një grua tjetër, 41 vjeç, u arrestua për dyshimin e ndihmës ndaj një personi të kërkuar nga autoritetet. Arrestimet u kryen në Londër dhe Berkshire.
Grupi Palestine Action ka marrë përgjegjësinë për protestën dhe e ka dënuar arrestimin, duke akuzuar qeverinë britanike se po mbron interesat e industrisë së armëve që furnizon Izraelin. “Qeveria po ndëshkon protestat paqësore që synojnë ndërprerjen e furnizimit me armë gjatë gjenocidit në Palestinë,” tha grupi në një deklaratë.
Pamjet e publikuara nga aktivistët tregojnë një person që lëviz me skuter elektrik drejt një avioni Airbus Voyager dhe spërkat motorin me bojë të kuqe.
Kryeministri britanik Keir Starmer e quajti veprimin “të turpshëm”, ndërsa Ministrja e Brendshme Yvette Cooper njoftoi vendimin për ta shpallur Palestine Action organizatë të ndaluar sipas ligjeve kundër terrorizmit. Nëse parlamenti e miraton këtë masë, çdo formë mbështetjeje ndaj grupit do të përbëjë vepër penale që dënohet deri në 14 vjet burg.
Cooper tha se metodat e grupit janë bërë “më agresive” dhe se ata kanë treguar “gatishmëri për të përdorur dhunë”. Grupi, nga ana tjetër, e quajti vendimin “sulm ndaj lirisë së shprehjes” dhe “reagim të çmendur për të mbrojtur fitimet e kompanive të armëve”.
Pas incidentit, qeveria njoftoi se po rishikon sigurinë në të gjitha bazat ushtarake në Britani.
Palestine Action është angazhuar më parë në protesta të ngjashme, përfshirë ngjyrosjen me bojë të kuqe të zyrave të Allianz Insurance në Londër dhe vandalizimin e fushës së golfit të presidentit amerikan Donald Trump në Skoci. /
